Daw tymor straeon tylwyth teg Opera Canolbarth Cymru i ben gyda chynhyrchiad newydd o glasur Humperdinck o ddiwedd y bedwaredd ganrif ar bymtheg, Hansel a Gretel. Fe’i seilir ar stori dylwyth teg y brodyr Grimm, lle caiff dau blentyn eu halltudio i’r goedwig gan eu rhieni rhwystredig a newynog. Yno, maent yn crwydro i grafangau gwrach ddrwg sydd â’i bryd ar eu pesgi a’u troi yn dorthau sinsir, cyn cael ei threchu ar yr eiliad dyngedfennol.

Mae gwaith pwysicaf Humperdinck wedi bod yn un o brif gynhalwyr tai opera dros y byd ers y perfformiad cyntaf yn 1893. Digwydda mewn byd unigryw ei sain, llawn telynegiaeth gyfoethog ac apêl felodaidd sy’n plethu’r gerddoriaeth yn dynn gyda chanu gwerin, lle daw anturiaethau’r plant yn fyw.

Cenir y cynhyrchiad newydd hwn yn Saesneg gyda chast o gantorion ifanc proffesiynol, a bydd corws o blant lleol i’r theatr yn ymuno ym mhob lleoliad. Creodd Cyfarwyddwr Cerdd OCC, Jonathan Lyness, offeryniaeth newydd arbennig ar gyfer sgôr wyrthiol Humperdinck, a berfformir gan gerddorfa bartner OCC, Ensemble Cymru.